Kamis, 03 April 2008

Tantangan Untuak Urang Minang

Ma ueh kiro-kiro padanan katonyo dalam bahasa Indonesia adolah unek-unek. Mudah-mudahan ambo indak salah. Mambicarokan falsafah iduik kito urang Minang tantang ABS – SBK, rasonyo kito samo-samo sapandapek, bahasonyo kito masyarakat minang paralu baliak batanyo kadiri kito masiang-masiang. Apo masih layak dipatahankan falsafah hiduik kito tu? Ambo yakin kito sadonyo pasti ingin mampatahankan falsafah tu, dan indak ingin mancampak kannyo iyokan?

Kito salamo ko baitu bangga bana jo falsafah nan sangaik takana tu. Rasonyo kito nan paliang santiang diantaro suku bangsa nan lain. Kalau bajalan, walaupun di nagari urang kapalo ko tagak luruih, dado mambusuang, dima sajo ado urang maota tantang kampuang halamannyo, kito ndak namuah kalah, kampuang kito, nagari kito lah nan paliang rancak, paliang santiang, jo paliang Islami. Bara banyak pahlawan jo urang hebaat nagari ko nan barasal dari ranah Minang? Indak taetong lai, dek karano sangaiak banyak nyo. Bara banyak ulama jo pamikia Islam nan barasal dari ranah Minang? Labiah dari jumlah jari tangan kito nan sapuluah ko.

Ditambah jo jari kaki bagai mungkin masih labiah. Cubolah tolong ituang dek dunsanak nan banyak. Kahebatan nagari awak, ka uletan urang awak alah sangaiak takana. Lai ado jo tampek di ateh bumi ko nan dihuni manusia urang Minang pasti ado.Kecek urang, ambo ndak tau persis doh, apo ko hanyo ota, konon sabalun Neil Amstrong mainjak kan kakinyo di bulan, ingin manancapkan bandera nagari nyo , kapling urang Minang alah ado disitu. Si Amstrong ko takajuik mancaliak, ado tulisan nan tantu sajo inyo ndak mangarati dan bisa mambaconyo. Tulisan tu kiro-kiro babunyi Rumah Makan ”Cimbuak”, Masakan Padang.

Dari segi pamahaman ka agamo, sosial budaya, satiok ado rapek-rapek di RT/RW urang awak salalu tampil. Urang awak salalu jadi tampek batanyo.Jan dikato tantang bisnis, urang kito paliang santiang.Ciek lai, iko nan paliang santiang bana, nan paliang Angek, tantang ka inginan sabagian besar nagari di Indonesia ko untuak mambenahi nagarinyo dari karusakan nan di akibaiak an dek pangaruh global. Nan marusak ganarasi mudo. baa kaindak, urang baru karibuik maundangkan PERDA SYARIAT, urang tuo-tuo kito dulu, jauah hari alah mambuek jo manatapkan falsafah hiduik nan sangaiak terkenal. Nan manjadi pacontohan dek para wakil rakyat nyo, ta bukti jo banyak nyo studi bandiang dari anggota DPRD nagari lain ka kampuang kito.

Baa ndak kasantiang kito tu?, baa ndak ka bangga kito. Iyo kan? Tapi kini dunia alah tabaliak, satidaknyo manuruik ambo.Ado nan salah di ranah minang kito ko. Nan tuo-tuo alah sibuk jo parasaiannyo, nan mudo alah sibuk pulo jo dunia nyo.Niniak mamak nan salamo ko manjadi tulang pungguang nagari antah kama nyo kini. Anak dipangku, kamanakan di jinjiang alah tingga papatah sajo lai. Iyo lai ciek jo duo nan manjalankan fungsinyo sabagai mamak, tapi labiah banyak nan mauruih anak jo bininyo sajo. Iduik memang samakin barek! Baliak ka falsafah hiduik kito nan manyatokan "Adaiak basandi sarak, sarak basandi kitabullah" tu, iyo tampaknyo alah (ampia) tingga kanangan sajo.Tapi kito tantu ndak namuah malapehkan atau mancampakan falsafah nan alah digariskan dek moyang kito tu. Kito harus basupakaik, bahasonyo falsafah tu harus tatap tagak di ranah minang nan kito cintai.Kini saatnyo urang Minang, baiak nan ado di parantauan maupun di kampuang halaman untuk samo-samo manyalamaik an falsafah ko.
Sagalo adaiak nan indak bakasasuaian jo ajaran agamo, kito campakan jauah-jauah.Jan dipaliharo juo lai!. Sabananyo awak kasadoan nyo alah tau, bahaso nan salah dan masih kito lakukan sampai kini tu hanyo dek karano "gengsi" sajo jo urang kampuang. Alasan salalu dibuek-buek, takuik, apo kato urang kampuang beko.Misalnyo satalah kamatian indak manujuah hari, indak maampek puluah hari dan lain-lain.Padahal awak jo sabagian urang kampuang sabananyo alah tau, bahasonyo itu salah. Paralu kabaranian jo kataguhan hati. Untuak mamak-mamak, cubolah jalankan fungsi kito baliak sabagai mamak nan sabana mamak.

Mamak nan diidam-idamkan dek moyang kito dulu.Kamanakan jan dipabiakan indak sumbayang, indak ka surau, indak mangaji, dan indak sakola.Kamanakan jan dipabiakan babuek salah, dan taruiah babuek salah. Jan anak sajo nan di uruih.Anak awak tu, juo kamanakan dek mamaknyo.Makonyo, samo-samo paduli lah lai mulai kini. Bia salamaiak generasi mudo kito. Untuak nan mudo-mudo, nan baru sa umua jaguang, jan balagak santiang, jan maraso jadi urang modern, jan takuik jiko dikatokan dek kawan main indak pandai bagaul. Bia kan sajolah, nan pantiang kito salamaik, sukses dunia jo akhirat. Mari kito basamo-samo mambangkik batang tarandam. Caronyo, iyo itu tadi, awak harus bangga jo falsafah ABS - SBK tu, dan harus malaksanakan nyo. Dan untuak marealisasikan nyo, tantangan barek nan ka kito basamo pikua.Jan takuik, kan papatah kito manyatokan “barek samo di pikua, ringan samo di jinjiang”, jadi ndak ado nan paralu kito takuik kan, nan pantiang ado kamau an.

Banyak nan paralu kito ubah, contohnyo ;Lai namuah maninggakan kabiasaan duduak dilapau, maota nan indak paralu?, ma abih kan wakatu sajo, kecek urang kini indak produktif.Lai namuah bapakaian sopan, tarutamo untuak nan mudo-mudo.Lai namuah ma iduik an baliak pangajian di surau-surau sahabih sumbayang magarik.

Lai namuah mancampak an sagalo adaiak nan indak sasuai jo tuntunan agamo.Lai namuah kito hormat ka urang tuo, baitu pulo nan tuo, lai namuah paratian ka nan mudo.Dan masih banyak lai nan lain. Kini saatnyo nan mudo basatu, ma ambiak aliah kandali dan punyo paranan gadang.Nan sakola tinggi, baiak di parantauan maupun nan di kampuang, pikia kan lah basamo. Baa caronyo supayo falsafah kito tu bisa sabana bana tagak di ranah Minang nan kito cintai.

Sasuai apo nan ta tulih jo kanyataan sahari-hari di lapangan, di tangah kahidupan masyarakaiak Minang, baiak di kampuang maupun di rantau.Urang Minang harus kambali baliak manjadi panutan dek sakalian urang, tampek batanyo jiko nyo sasek, tampek mancontoh jiko nyo salah, tampek mangadu jiko nyo ka susahan.

Indak kalah penting tantunyo, adolah peranan dari Niniak Mamak, Bundo Kanduang, Kaum Cadiak Pandai, baiak nan ado di dalam pamerintahan (sebagai fungsi Eksekutif, Legislatif, dan Yudikatif) maupun nan duduak di lua pamerintahan sarupo di LKAAM (Lembaga Kerapatan Adat Alam Minangkabau). Supayo kapalo ko kalau bajalan bisa tagak baliak. Dado bisa mambusuang pulo. Ado ka banggaan manjadi urang Minang. Iyo kan?

sumber:cimbuak.net

Tidak ada komentar: