Selasa, 10 Maret 2009

Babuek Sabalun Bapikia

Espe St.Soeleman


“Iko baru hebat! Alun jadi wakia rakyaik lah babuek,” kato Kari Garejoh nan sadang mambaliak-baliak surek kaba.

Mulonyo, Kari indak pulo jaleh mukasuik barita nan bajudul ‘Caleg Segel Sekolah’, tapi nalurinyo mangatokan, apo nan dikarajokan dek Caleg tu jauah panggang dari api. Mustinyo sabagai Caleg inyo mampacaliak-an tauladan ka urang-urang nan kadiwakilinyo di dewan. Kini, nyatonyo indak, rumah sikola tampek baraja anak-anak, tampek mendidik anak-anak bangsa, justru disegelnyo.

“Itu samo jo semen Padang mah, Kari. Pabirik simin di Indaruang ko kan sajak dulu punyo semboyan ‘telah berbuat sebelum orang lain memikirkannya’. Yo, nan sarupo ikolah Caleg untuak dipiliah bisuak,” potong Angah Piyan.

“Apo nan dibueknyo? Lai indak samo jo Caleg-Caleg nan banyak tu ha. Inyo datang ka lapau-lapau, dibayiakannyo urang minum. Sudah tu datang ka tampek urang bagotong royong, dibaenyo bakacak pinggang. Urang balunau, nan inyo tagak pinggang jo baju basandiang. Kok ado urang batandiang kasti atau main rondes bagai, inyo lah tibo pulo. Diumbuak urang rami jo piala. Pokoknyo banyak se caro-caro nan dibueknyo untuak maumbuak awak-awak ko,” kato Tan Baro batanyo.

“Ha.....ha....., iko babeda sangaik. Kalau nan sarupo Tan Baro sabuik tadi, lah biaso tu nyo. Kini, nan dibuek dek apak ko adolah manyegel rumah sikola. Tadi ambo baco salayang, karano rumah sikola disegel, anak-anak es-de tapaso baraja di bawah atok rumah urang. Tapi, untuang lai indak lamo,” jawek Kari manjalehan.

“Eh...., kok itu yo, hebat mah. Kok ado se agak limo urang nan sarupo itu, mako limo buah rumah sikola pulo dikuncinyo dalam sabulan. Kasudahannyo, anak sikola ko baraja di dalam samak. Ambo sangko tadi kok iyo nan babuek nyato untuak rakyaik....,” kato Angah.

Baitulah ota di lapau Uwo Pulin duo hari nan lapeh. Di hari kapatang, lapau tu batutuik, karano Uwo pai baralek ka kampuangnyo. Tindakan oknum Caleg nan manyegel rumah sikola tu indak bisa ditarimo dek komunitas lapau Uwo. Karano, apo nan dibueknyo tu namonyo indak mambangun, tapi marugikan urang banyak.

Walaupun oknum Caleg tu bajuang untuak mampatahankan haknyo, namun di nagari ko masih banyak caro nan bisa ditampuah. Indak ado kusuik nan indak salasai, karuah nan indak tajaniahan, kalau duduak sahamparan dan disalasaikan jo hati nan janiah.

“Sampai di sinan pulo bateh kamampuan atau ilimunyo, baa kecek awak,” salo Tacin.

“Bisa se apak tu mangunci rumah sikola dan indak eboh bana, kalau statusnyo indak Caleg. Jo status nan inyo sandang kini tu, pasti urang di dakek-dakek rumah sikola tu ka mangecek atau mamandang miriang ka apak tu. Nah, karajo saroman itu pasti banyak saketeknyo mampangaruhi tujuannyo. Baa dek Tan Baro?” Kato Uncu Labai mampaiyokan ka konconyo.

Tan Baro hanyo bisa maangguak sambia galak manih. Dalam pikirannyo, indak wajar tindakan oknum Caleg nan sarupo itu. Karano, untuak kaparaluan surang, anak sikola manjadi korban.

“Tapi, awak basyukur juo lai capek ado paretongan, sahinggo anak-anak tu bisa baraja baliak. Tapi untuak panyalasaiannyo, diagiah wakatu sapakan ka kapalo sikola jo komite,” kato Kari baliak.

“Kok indak salasai dalam sapakan ko, apo rumah sikola tu disegelnyo baliak?” Tanyo Angah.

“Antahlah. Kok itu iyo indak tau ambo doh. Nan ambo tau cuma, apak ko lah babuek, sabalun bapikia. Mukasuiknyo sabalun inyo pikiakan dampaknyo,” jawek Kari.


hariansinggalang.co.id
selasa, 10 maret 2009

Tidak ada komentar: